Насихат Сүгірұлы

«Абақтының ақ үйі
Шілтерлі темір сауытша.
Үсті темір, асты тас,
Жамбасқа тиді мамықша».
— Насихат Сүгірұлы

1916 ЖЫЛ
Қиын-қыстау өткелі
Ақын еді төкпелі.
Окоп қазуға алынып,
Бір жылдай елден шеттеді.
«Айдады патша жыраққа»
Сондағы шерді төккені.

1930 ЖЫЛ
Күндестің қысып толғағы,
Еркіндік ұшты қолдағы.
Абақтыға қамалып,
Қиямет-қайым орнады.
«Еділ, Жайық – екі су»
Сондағы ұзақ толғауы.

1937 ЖЫЛ
Екі жыл таңын атырған
Абақты аздай, антұрған
Қастары қамап, қапылған
«Үштікпен» үкім шақырған.  
Ақиық ақын осылай  
Отыз жетіде атылған.  

Титтей түйіндеме:  
Насихат Сүгірұлы (1889-1937) – ақпа ақын. 1930 жылы 22 ақпанда жазықсыз қамауға алынып, әуелі Астраханда, кейіннен Атырау түрмесінде азап шегеді. 1937 жылы екінші рет тұтқындалып, сол жылы қараша айының 22-ші жұлдызында «үштіктің» шешімімен ату жазасына кесіледі.