Үш жұрт

Зейін сап, өзің парықта,
Артығы жоқ біліктің.
Қазақы біздің салтта
Үш жұрты бар жігіттің.
Өмірдің адам қонағы,
Үш жұртқа жақсаң ұлысың.
Алғашқы жұртың болады
Өз жұртың – жақын туысың.
Отырар асын дайын ғып,
Келер деп күйеу бір күні.
Екінші жұртың – қайын жұрт,
Жарыңның туыс, төркіні.
Үкілер сен деп үмітін,
Қадірлей білсең бағасын,
Үшінші жұртың, жігітім,
Тілеуқор сенің нағашың.
Осылардың төрінде
Шапағатқа бөленіп,
Үш жұртыңмен өмірде
Көктейсің бір көгеріп.