Жеті, тоғыз, қырық және жұлдыз жорамал

Ғажайып тылсым сырлары
Тұңғиыққа енейік.
Жаратылыс туралы
Есеп шешіп көрейік.
Өмірге келер гүл бөбек
Әулие-әмби, пір қолдап.
Тоғыз ай, тоғыз күн – демек,
Екі жүз сексен күн болмақ.
Екі жүз сексен бөлінсе,
Жеті қат көкке – қырық күн.
Әр ғаламшар өзінше
Ұясындай үміттің.
Қырық күн сайын ретпен
Шаранаға өбек боп.
Аялап ақ тілекпен,
Құдіретіне жебетпек.
Бірі – бойға қан беріп,
Екіншісі – ет түзер.
Үшіншісі – жан беріп,
Бірі түйсік жеткізер.
Бірі – нықтап сүйегін,
Бірі – сезім берсе егер.
Ал ең соңғы киелің
Келбетіне нұр себер.
Әр ғаламшар борышын
Өтеген соң төрінде.
Айы-күні толысып,
Сәби келер өмірге.
“Осымен тәмәм бәрі де,
Біттік біздер” – демейді.
Жеті кие әлі де
Желеп оны жебейді.
Тағы да алып кезегін
Қырық күндік, бағалы.
Тағдырдың әр кезеңін
“Қас-қабақпен” бағады.
Бақытың да, бағың да
Ықпалында солардың.
Жұлдызыңа бағын да,
Табынып өт соған мың.
Жеті қат көк – кие дер
Тағдырыңды шешеді.
Міне, осыған сүйенер
Жұлдызшылар есебі.
Өміріңді алдағы
Болжап берсе, тосылма.
Жұлдыз жорамалдағы
Бар құпия осында.
Дүниенің тұғыры –
Жеті қат көк айналған.
Бар тірліктің ғұмыры
Жеті әлемге байланған.
Жеті әлемнің – иелік
Біліп ал да амалын.
Жұлдыздарға сүйеніп,
Аш жұмбақ-сыр қамалын.