Билік деген – бір айдын – Фариза Оңғарсынова

Билік деген – бір айдын
ақылсызға жел берер:
кенжесіндей құдайдың
алшаңдайды пенделер.
Билік құрған есердің
бар азабын ел көрер:
күнін кешіп мешеудің,
шарасыз ел сенделер.
Билік тисе тектіге,
жаны жұмсақ, кең келер,
Ойлайтыны жер мен ел,
теңсіздікті ол теңгерер.
Қариясын қадірлеп,
талаптыға жол берер,
қайғылының қамын жеп,
адалдарға қол берер.
Көргенді ме, харам ба,
тоты ма, әлде торай ма –
білгің келсе,
адамға
билікті бер – сол айна!