Жалп-жалп еткен жапалақ

(Қазіргі қазақ әліпбиіне түсірілген көшірмесі)
* * *
Жалп-жалп еткен жапалақ,
Жазы да кімге жолдас болмаған.
Жағы түкті айуан,
Мұңлантып кімді жаяу салмаған.
Даладағы бәйтерек саясы,
Кімге салқын болмаған,
Құландар ішпес бұршақ қақ
Кімдерге шербет болмаған.
Саздауға біткен сары ағаш,
Кімдерге сайғақ болмаған!
Терезеден тесе қараған,
Дестелеп шашын тараған,
Қудалаған өскен арулар,
Кімдерден жылай қалмаған.
Сағағына сары шіркей ұялап,
Мал іздеген ерлердің
Қайда басы қалмаған!?

---