Қараторы, ботакөз

Алақанда бәйек боп аялаған,
Ас дәмін қонағынан аямаған.
Ұлан-асыр осынша ықыласқа,
Шіркін-ай, ішпей-жемей тояды адам.
Ақсақалдар төрде отыр малдас құрып,
Қымыз жұтып, сусындап, жамбас мүжіп.
Осында отыр өңкей бір сауықшыл жас,
Қазақтың салт-санасын жалғастырып.
Өз мекенін, өз елін берік сүйген,
Шекеге дөңгелектеп бөрік киген.
Осында отыр өңшең бір сал-серілер,
Бұл кеште домбыраға ерік тиген.
Келіп отыр жастар да өрімделген,
Қараторы, ботакөз, керім келген.
Ас әзірлеп сыртта жүр ас иесі,
Қонаққа көрпе төсеп, төрін берген.