Ешкі өсір (Топтама өлең)

Бөрте лақ

Бөрте лақ,
Құлдыр шұнақ
Лағы еді шыбыштың.
Ойнақтайды,
Ұстатпайды
Бәрін естіп дыбыстың.

* * *
Көп лақ

Тастан-тасқа
Қарғымаса,
Шыдамайды көк лақ.
Таймай тастан,
Нық-нық басқан
Шұбырады көп лақ.

* * *
Ешкі тастан шығыпты

Топ-тобымен,
Ентелеген
Лақ бұл қызық қылықты.
Тастан таймай,
Жүр құламай
Ешкі тастан шығыпты.

* * *
Серке

Серкеш біздің
Бәріміздің,
Аялайтын еркеміз.
Сергек сері,
Күн ілгері
Қой бастайтын серкеміз.

* * *
Ешкі тоңғақ

Жауса жауын,
Іздеп таудың
Пана, үңгір ықтасын.
Күн ашыла
Тасқа шыға
Қыздырады арқасын.

* * *
Ешкі еті

Түбіті – кен,
Терісі – тон,
Басқа киім іздеме.
Бүрген менен
Жеміс жеген
Ешкі етін күзде же.

* * *
Ешкі сүті

Ешкі сауған
Құрт-май алған,
Нәрлі сүті бұлақтай.
Пісіріп іш,
Береді күш,
Құйғытасың құр аттай.

* * *
Көбіршік

Айран қатық
Қышқыл татып,
Жасымыздан көп іштік.
Қатығына
Сұйылтуға
Ешкі саудық көбіршік.

* * *
Өсімтал

Шыбыш, туша
Егіз туса,
Екі жылда тоғыз бас.
Құрақ ұшып,
Бағып, күтіп,
Оған ауды ықылас.

* * *
Ешкі өсір

Сүтін ішсең – бал,
Өзі өсімтал,
Пайдасы мол көл-көсір.
Түсініп ал,
Сүйкімді мал,
Мал өсірсең, ешкі өсір.

---