Айтатын сыр

Айтатын сыр,
Жазатын жыр көп менде.
Шалқып жүріп байқамаппын көктемде.
Шаншу болып қадалған оқ сөздерден
Әжептәуір қара дақ бар өкпемде.
Жүзуді кім үйретеді үйрекке!
Жыр жазуды сен де маған үйретпе!
Ащысы мен тұщысынан тірліктің
Бір уыс тас жатыр мына бүйректе!
Маған деген құрмет кем бе,
Сый кем бе?!
Қай жұмысым келмей жатыр икемге?!
Домбыраның көп тартылған ішегіндей,
Байқап тұрсам,
Жұқарыпты жүйкем де!
Бірақ елге ырза болып жүремін.
Миллиардын беріп жатыр жыр-егін.
Кремльдің сағатындай
Жалғыз-ақ
Ырғағынан жаңылмаған жүрегім!

---