Президентке сайлаушылардан құлақ қағыс

Қазақстан Республикасы Президенттігіне кандидат Н.Ә.Назарбаевты жақтаушылар форумында сөйлеген сөз

Алматы. Республика сарайы. 04.01.1999 жыл

Біз жақында жазушы, журналист Камал екеуміз Жезқазған жазирасына, қарт Қарсақбай, Ұлытау өңіріне барып кайттық. Мың-сан сайлаушылармен кездестік.

Мен қазір тек сол халықтан естігенімді айтамын.

Сайлаушылар аманат айтты:

— Дүниеге келген жас сәби жетіге жеткенше жерден таяқ жейді. Одан кейін шінжәу, дімкәс, мешел болмаса жүгіріп жүріп кетеді, — деді.

— Қазақстан атты жас мемлекет азаттық алғалы жеті жыл өтті. Жеті жастан асқанша Қазақстан жерден таяқ жеген жоқ. Жемқорлардан, Парақорлардан, Қорқаулардан қорлық көрді, — деді.

Сайлаушылар өкпе айтты:

— Жер — біздің Анамыз. Анасы баласын қорламайды, — деді.

—Бізді қорқаулардан қорғай алмаған прокуратураға, милицияға, кауіпсіздік қызметкерлеріне, сотқа, кеденге өкпеліміз, — деді.

— Олар тек майда-шүйде шабақтарды аулайды. Шортандар мен жайындар әлі тайраңдап жүр, — деді.

Сайлаушылар аманат айтты:

— Президент Нұрсұлтан қорқаулармен күресті күшейту туралы Жарлық жариялады. Енді содан нақты нәтиже шығарсын деді. Сонда Жер — Ананың дәулеті өзімізге бұйырады. Сонда біз қиналмаймыз, — деді.

Сайлаушылар айтты:

— Кезінде Түркия халқы Мұстафа Кемал Ататүрікке қандай сенсе, біз де Нұрсұлтанға сондай сенеміз, — деді.

— Қазіргі кезең — буырқанған, толқыған телегей теңіз сияқты. Қазақстан сол теңізде жүзіп бара жатқан алып кеме сияқты, деді. Ал капитан — Нұрсұлтан, — деді.

— Қазақстанда Нұрсұлтандай басқа да ұл-қыздар бар, — деді. Нұрсұлтаннан басқа жарамды азамат тумаса, ұлтқа ұят, — деді.

— Бірақ дәл қазір кеме капитанын ауыстыруға болмайды, — деді.

— Қазақстан кемесін көп жылдан бері Нұрсұлтан басқарып келеді, қалай басқаруды біледі. Ол — теңіздің қыр-сырын жақсы меңгерген. Жаңадан басқа біреу келсе, ол теңіз астындағы жасырын жартастарға, жау тастарға кемені соғып алуы мүмкін, — деді.

Сайлаушылар сенім айтты:

— Алып кемені дауылдан аман алып шығатын Президент Нұрсұлтан, — деді.

— Қазақстан есімді алып кемені Нұх пайғамбар сияқты жартастарға, жау тастарға соғып алмай, ашық айдынға, қой үстіне бозторғай жұмыртқалайтын жасыл жағалауға алып шықсын Нұрсұлтан, — деді.

Тағы да сайлаушылар айтты:

— Нұрсұлтан бізді бәле-жаладан, қараниет қақтығыстардан аман алып қалды, — деді. Біздің дұғамыз: Өзін өлме, өзгені де өлтірме!

— Нұрсұлтан бізді әлемге танытты. Әлем бізді мойындады. Әлденіп алсақ, әлем бізді сыйлай түсетін болады, —деді.

Сайлаушылар аманат айтты:

— Нұрсұлтан халықаралық, ұлтаралық дана дәнекер. Шекарамызды таспен де, доспен де қоршай берейік, — деді.

Сайлаушылар өкініш білдірді:

— Республика ауыл шаруашылығының көсемдері көзімізге көк шыбын үймелете жаздады. Нұрсұлтан осыған қатты назар аударсын, — деді.

— Ауыл мәдениетін, жалпы мәдениетті өлімсіретпесін,—деді. Ататүрік айтқан: «Мәдениеті кем ел — бір көзі соқыр, бір аяғы ақсақ кемтар адам сияқты» деген.

Біз көрген, біз тыңдаған халықтың талап-тілегі, аманаты осындай.

Лайым да осы тілек қабыл болғай!

---