Біз білмеппіз, білгенде...

Зұлқарнайн алейһиссалам әскерімен жолда келе жатып «аяқтарыңа ілінген нәрселерді жинай жүріңдер» деп әмір береді.

Әскері бұл әмірді естіген кезде іштерінен бір бөлігі «Көп жүрдік қатты шаршадық. Түн ішіндеміз, оған қоса аяғымызға ілінген нәрселерді жинап босқа қиналамыз ба, ешнәрсе жинамаймыз» деген шешімге келіп, ешнәрсе жинамайды.

Екінші бөлігі «Қолбасшымыз бұйырған екен, әміріне бағынайық аз ғана болса да жинайық. Өйткені Қолбасшыға қашанда мойынсұну керек» деп аз ғана жинайды.

Үшінші топ болса «Қолбасшымыз ешнәрсені босқа әмір етпейді. Міндетті түрде бір нәрсені біліп айтқан болу керек, әмірін орындаймыз» деп бүкіл қаптарын бетіне дейін толтырады.

Таң атқан кезде бүкіл әскер түнде алтын қойнауынан өткендерін түсінеді. Аяқтарына тиген нәрселердің алтын екенін ешкім аңғармаған болады. Сонда әмірді тыңдамай еш нәрсе алмаған бірінші топ:

— Қап неге алмадық! Неге тыңдамадық қолбасшымыздың сөзін. Ең болмағанда біреуін алғанымызда... деп өкініп қалады.

Екінші топ болса өз-өздерін сөге бастайды:

— Қап біраз тағы алуымыз керек еді. Қалталарымызды, қаптарымызды аузына дейін толтырып алуымыз керек еді...

Үшінші топ та өкініп:

— Керексіз, пайдасыз заттарымызды тастағанда бұдан да көп жинайтын едік...

Міне осы мысалда болғаны секілді, ахиретте бүкіл адамдар да өкінеді. Кәпір адам:

— Неге иман етпедім. Сенгенімде ең болмаса тозаққа түссем де, иманымның арқасында соңында бәрібір жәннатқа кірер едім. Мәңгілік тозақтан құтылар едім, — дейді.

Мұсылман болса да сауабы аз кісі:

— Бұдан да көп сауапты істер жасауым керек еді. Бұдан да көп ниғметке қауышар едім, — дейді.

Мұсылман болып, сауабы көп болған кісі болса:

— Қап, бұдан да үлкен дәрежелерге көтеретін көбірек ғибадат жасауым керек еді, көбірек садақа беріп, көбірек ораза тұтып, көбірек сауап жинайтын амалдар жасауым керек еді... деп өкінеді.

Әлеуметтік желілерде бөлісіңіз: