Тосын сый (көрініс)

(Сахнаға әпкелі-сіңлілі екі қыз шығады.)

Айша:

— Айым, әкеге тосын сый жасайықшы? Біздің әкеміз ең керемет әке болғаны үшін!

Айым:

— Айша, сен расында біздің әкемізді «ең керемет әке» - деп ойлайсың ба? Біздің үйіміз де, көлігіміз де, тіпті ақшамыз да жоқ қой?!

Айша:

— Солай-ақ болсын! Бұл уақытша ғой? Есесіне бізде әлемдегі ең мейірімді, ең тақуа, ең еңбексүйгіш әке бар емес пе?

Айым:

— Ия.. Енді ол жағы рас. Бірақ...

Айша:

— Ешқандай «бірағы жоқ». Сабыр етсек бізде әлі сен армандаған нәрсенің барлығы болғанын көресің! Біз жоқ нәрселерге емес, бар нәрселерге назар аударайықшы..?! Санайықшы бізде не бар?

Айым:

— Әкеміз бен анамыз бар!

Айша:

— Денсаулығымыз бар!

Айым:

— Үйде татулық, тыныштық, мейірім бар!

Айша:

— Ата-анамыздың жұмысы бар!

Айым:

— Жейтін асымыз, таза, мөп-мөлдір суымыз, паналайтын үйіміз, тұрмыстық заттарымыз бар.

Біз қазір санай берсек, кешке дейін отырамыз. Одан да әкеге қандай тосын сый жасамақшы едің? Сол туралы айтшы?

Айша:

— Мен әкеме арнап өлең шығардым. Қазір келгенде оқып берейік? Соны айтқым келген...

Айым:

— Керемет! Әкелші, оқып көрейін..?

(Айша ұялып қағазға жазылған өлеңді береді. Айым жылдам оқып шығып, сіңлісін құшақтайды.)

Айым:

— Айша, сен қандай мейірімді, ақылды қызсың! Мен сені мақтан тұтам!

Айша:

— Рақмет, әпке! Мен де сізді жақсы көрем, мақтан тұтам! (Есік жаққа қарап):

— Әкем келе жатыр! Ас дайындайық? - деп, стол үстіндегі беті сүлгімен жабылған шыны-шәйнектерді ашып, қасықтарды қоя бастайды.

(Осы кезде сахнаға әкесі шығады.)

Әкесі:

— Ассаляму алейкум! Қалайсыңдар қыздарым? Аналарың әлі келмеген бе?

Қыздар:

— Уағалейкумуссалям әкетайым! Анашым жұмыстан енді шығыпты. Шаршамай келдіңіз бе? — деп, Айша әкесінің қолындағы заттарын алады. Айым леген мен құман әкеліп, әкесінің қолына су құяды. Қолын жуып, Айымның берген сүлгісіне қолын сүрткен әкесі:

— Бақытты бол! Көп жасаңдар, алтын қыздарым менің! - деп,  екеуінің маңдайларынан сүйеді.

Айым әкесіне шай құйып береді. Айша ақырын әкесінің жанына келіп:

— Әкешім, біз сізге арнап өлең шығардық! Оқып берейік пе?- деп, еркелей қарайды.

Әкесі:

— Мәссаған, менің құлыншақтарым тек ақылды, аналарына көмекші ғана емес, әрі талантты, дарынды қыздар екен ғой...?!  Қане,  балапаным! Оқи ғойшы..?

Айша:

— Екеуміз кезекпен оқиық әпке?  Мен жаттап алдым.  (қағазды Айымға береді)

Айым:

— Баста! — деп Айшаға қарайды.

Айша:

— Әке, сізді жақсы көрем..
Мен үшін сіз ғажапсыз!
Мен туғалы еркелетіп,
Барын берген жомартсыз!

Айым:

— Не айтсам да орындайтын,
Берекенің көзісіз..
Әлі күнге арқалайтын,
Алып жанның өзісіз!

Айша:

— Ассақ-тағы тоғыз жастан,
«Бөбегім» деп ойлайсыз.
Әлемдегі бар жақсыны,
Бізге ғана сыйлайсыз!

Айым:

— Әке, сізді, жақсы көрем,
Мейірімдісіз нұр жүзді.
Тәтті әкеліп қуандырған,
Ұмытпаспын әр күнді.

Айша:

— Бізге қылған жақсылығың,
Мың есе боп қайтса екен.
Ұлы арманым: ізгі ұрпақ боп,
Жемісімді жегізсем...

Айым:

— Әке сіздің атыңызды,
Танытып кең әлемге.
Қуандырсам шаттандырып,
Болып елге өнеге!

Айша:

— Бізді ылғи мақтан тұтып,
«Құлыным» — деп жүресіз.
Біз үшін сіз әлемдегі —
Қымбат жансыз, білсеңіз...?!!

(Әкесі толқып,  көзіне жас алып отырып қалады. Қыздары қасына жүгіріп келіп:

Айша:

— Әке, ұнамай қалды ма? Неге жылайсыз?

Айым:

— Әкешім, дұрыс емес бір сөз айтып қойдық па?

Әкесі қыздарын құшақтап, кезекпен маңдайларынан иіскеп:

— Жоқ,  күндерім! Мен қуаныштан, бақыттан жылап отырмын. Жаратқанның маған сендер секілді ең жақсы ботақандарды сыйға тартқанына қуанып жылап отырмын!- дейді.

(Қыздар қуанып, күліп жібереді)

Айша:

— Әкетайым,  анашым екеуіңіз аман болсаңыздар болды. Басқасы өз уақытымен бола береді. Біз сіздердің осы тату-тәтті қарым-қатынастарыңыздың мәңгі болғанын қалаймыз!

Айым:

— Әкешім, мен бүгін еңбек сабағынан керемет үй жасадым. Жүріңізші.. көрсетейін?! Әкелейін десем, әлі кеппеді, — дейді. 

Әкесі:

— Жаным сол! Шебер қызым менің! Қане, ендеше көрсете ғой? Қандай ғажап екенін көрейік... — деп, екі қызын құшақтап, сахнадан шығып кетеді.

(Өзге оқушылар столды алып кетеді. Сосын барлығы қол ұстасып бірге шығып, көрермендерге ілтипат білдіріп, бастарын сәл изеп, қайта кетеді.)

---

---