Ахмет Байтұрсынұлы: жастар, оқу, тәрбие, афоризм... туралы айтқаны

Жастар неге журналистикаға қызығушылығын жоғалтып барады?

Автор: Асем Тулепова

Қазір ақпаратты телефоннан бірнеше секундта тауып алуға болады. Жаңалық көру үшін теледидар қосып отырудың да қажеті жоқ. Instagram, TikTok, Telegram сияқты әлеуметтік желілерде жаңалықтар тез тарайды. Осындай өзгерістер журналистикаға да әсер етіп жатыр. Бірақ қазіргі жастардың арасында журналист болғысы келетіндердің саны қандай және олар бұл мамандықты не үшін таңдайды?

Менің ойымша, бұл сұраққа бір ғана жауап беру қиын. Себебі бір жастар журналистиканы қызықты мамандық деп санаса, кейбіреулер оның болашағына күмәнмен қарайды.

Журналистиканың ең басты ерекшелігі — қоғамдағы болып жатқан жағдайды адамдарға жеткізу. Журналист тек жаңалық айтып қана қоймайды. Ол ақпаратты тексеріп, адамдардың пікірін тыңдап, маңызды мәселелерді көтереді. Мысалы, қоғамда белгілі бір мәселе пайда болса, журналист сол мәселені зерттеп, оның себебін және адамдарға әсерін көрсетуге тырысады.

Бірақ бүгінгі таңда журналистің жұмысы бұрынғыдан өзгерді. Қазір журналист мақала жазумен ғана шектелмейді. Ол видео түсіреді, сұхбат алады, әлеуметтік желіге материал дайындайды, кейде тікелей эфир жүргізеді. Сондықтан қазіргі журналистен бірнеше дағдыны қатар меңгеру талап етіледі.

Бұл өзгерістің жақсы жағы да бар. Жас журналист өз материалын үлкен редакцияға бармай-ақ әлеуметтік желі арқылы көпшілікке көрсете алады. Телефонның өзі ақпарат жинауға және видео түсіруге мүмкіндік береді. Егер материал қызықты болса, оны мыңдаған адам көруі мүмкін.

Сонымен қатар қиындықтары да бар. Әлеуметтік желіде ақпарат өте жылдам тарайтындықтан, кейде жалған ақпарат та көп кездеседі. Журналист үшін мұндай жағдайда ақпараттың шынайылығын тексеру өте маңызды. Бір қате ақпараттың өзі адамдардың пікіріне әсер етуі мүмкін.

Журналистиканың тағы бір маңызды мәселесі — мамандыққа деген көзқарас. Кейбір адамдар журналистикада жұмыс табу қиын деп ойлайды. Ал кейбір жастар журналистиканы тек теледидардан жаңалық жүргізумен байланыстырады. Шын мәнінде, қазіргі журналистикада интернет-журналист, SMM маманы, контент жасаушы, редактор, корреспондент сияқты көптеген бағыт бар.

Меніңше, журналистикаға қызығатын адам ең алдымен адамдармен сөйлесуден және жаңа нәрсе білуден қорықпауы керек. Себебі журналистің күнделікті жұмысы әртүрлі адамдармен кездесумен байланысты. Бір күні студентпен сұхбаттасса, келесі күні маманнан пікір алуы мүмкін.

Қорытындылай келе, журналистика жоғалып бара жатқан мамандық емес, керісінше, заманға қарай өзгеріп жатқан сала. Бұрын газет пен теледидар негізгі ақпарат құралы болса, қазір әлеуметтік желі мен интернет те журналистиканың бір бөлігіне айналды. Сондықтан жастардың журналистикаға қызығушылығы тек дәстүрлі журналистикаға емес, оның жаңа бағыттарына да байланысты.

Журналист болу — тек камераның алдына шығып сөйлеу емес. Бұл — ақпарат іздеу, сұрақ қоя білу, шындықты тексеру және қоғамдағы маңызды мәселелерді адамдарға жеткізу. Сол себепті бұл мамандықты таңдаған адам үнемі ізденіп, заманмен бірге дамуы керек.