Көрісу күні – амандасудан басталған жылулық

Көктемнің алғашқы айында, 14 наурыз күні қазақ халқы ерекше мейрамды атап өтеді. Бұл – Көрісу күні. Ата-бабаларымыздан келе жатқан осы бір дәстүр адамдар арасындағы сыйластықты арттырып, үлкенге құрмет, кішіге ізет көрсететін, жылулық пен мейірімге толы күн ретінде сақталып келеді.

Көрісу күні – тек жай ғана амандасу емес, бұл – қыстан аман-есен шығып, жаңа жылды жақсылықпен бастау дегенді білдіреді. Ежелден бұл күнді жаңа жылдың бастауы деп қабылдаған халық үлкендерді арнайы іздеп барып, қол алысып, төс қағыстырып, ақ батасын алған. «Жасың құтты болсын!» – деп тілек айтып, әр үйді қонаққа шақырып, дастарқан жайған. Бұл дәстүр адамдардың бір-біріне деген қамқорлығын білдіріп қана қоймай, береке мен бірліктің, татулықтың символына айналған.

Амал мерекесі деп те аталатын бұл күн, әсіресе, Батыс Қазақстан, Атырау, Ақтөбе, Маңғыстау және Қызылорда өңірлерінде кеңінен тойланады. Бірақ қазіргі таңда бұл дәстүр еліміздің түкпір-түкпіріне тарап, ұлттық құндылықтарымыздың бірі ретінде қайта жаңғырып келеді. Жастар жағы үлкендердің ақыл-кеңесін тыңдап, бата сұраса, үлкендер қауымы өткен жылға тәубе етіп, жаңа жылдан жақсылық күтеді.

Бұл күннің ең басты ерекшелігі – адамдар арасындағы араздықты ұмытып, кешірім сұрау, ескі реніштерді өшіру. Көрісу – тек бір күндік мереке емес, бұл – халықтың бір-біріне деген шынайы ықыласы мен ниетін білдіретін ұлттық құндылық.

Жылы сөзбен басталған,

Мейірім төккен күн бүгін.

Бір-бірімен қауышқан,

Берекеге ұмтылсын!

Бұл ерекше күннің маңызын жоймай, ұрпақтан-ұрпаққа жеткізу – әрбіріміздің парызымыз. Көрісу күні құтты болсын!

©Төлеген Кәусар Өнербекқызы