Нумерологияға сенім: адамаралық қарым-қатынасқа ықпалы

    Қазіргі қоғамда адамдар өзін және айналасындағы адамдарды тереңірек түсінуге ұмтылады. Осы ізденіс барысында түрлі рухани, психологиялық және эзотерикалық ілімдерге қызығушылық артып келеді. Солардың бірі — нумерология, яғни сандар арқылы адамның мінез-құлқын, өмірлік бағытын және қарым-қатынас ерекшеліктерін түсіндіруге тырысатын ілім. Ежелгі дәуірден бастау алатын бұл ұғым бүгінгі күні де кеңінен талқылануда.

Нумерологияға сенім деңгейі

Нумерологияға сенетін адамдардың нақты саны ғылыми тұрғыда есептелмегенімен, әлеуметтік сауалнамалар бұл құбылыстың қоғамда белгілі бір деңгейде таралғанын көрсетеді. Мәселен, АҚШ-та YouGov зерттеу орталығы жүргізген сауалнамаға сәйкес, респонденттердің шамамен 37 пайызынумерология адамның мінезі мен өмір жолын түсіндіре алады деп есептейді. Бұл сауалнама 1 000-нан астам адамды қамтыған.

Тағы бір дерекке сүйенсек, америкалықтардың шамамен 15 пайызы нумерологияға шынайы сенеді. Бұл көрсеткіш халық санына шаққанда шамамен 50 миллион адамға тең болуы мүмкін. Әсіресе бұл сенім рухани және New Age бағыттарына қызығушылық танытатын топтар арасында кең таралған. Қазақстанда да мұндай ілімдерге қызығушылық бар. Университеттік әлеуметтік зерттеулердің бірінде респонденттердің 36 пайыздан астамы нумерология мен астрологияға қызығушылық білдірген. Бұл дерек қазақстандық қоғамның белгілі бір бөлігі эзотерикалық көзқарастарға ашық екенін көрсетеді.

Адамаралық қарым-қатынасқа әсері

Нумерологияның адамаралық қарым-қатынасқа ықпалы екіжақты сипатқа ие. Бір жағынан, адамдар сандар арқылы өзін тануға, мінез ерекшеліктерін түсінуге және эмоцияларын реттеуге тырысады. Мысалы, «өмір жолы саны» арқылы адам өз қарым-қатынас стилін талдап, әріптестерімен немесе жақын адамдарымен тіл табысу жолдарын іздеуі мүмкін. Кейбір адамдар үшін нумерология жеке тұлғалық даму құралы ретінде қабылданады. Ол өз-өзіне сырт көзбен қарауға, қарым-қатынастағы қиындықтарды сабырмен қабылдауға психологиялық тұрғыда көмектесуі ықтимал.

Ғылыми және сын көзқарас

Алайда ғылым тұрғысынан алғанда, нумерология ғылыми негізі жоқ псевдоілім ретінде бағаланады. Ғалымдардың басым бөлігі нумерология қағидаттарын қолдамайды, себебі оның тұжырымдары бақылаулы эксперименттер мен дәлелденген зерттеулер арқылы расталмаған. Сонымен қатар бірқатар діни көзқарастар нумерология сияқты тылсым практикаларды сынға алып, оларды рационалды ойлау мен логикаға қайшы деп санайды.

«Journiverse» білім беру орталығының оқушысы: Аяулым Махмуд