Қозы Көрпеш – Баян Сұлу күні: ұлттық махаббат мерекесінің мәні - Тұрсынтай Ерасыл 

     Қазақстанда жыл сайын 15 сәуір күні Қозы Көрпеш – Баян Сұлу күні атап өтіледі. Бұл күн ел ішінде ғашықтар күні ретінде кеңінен танылған. Ол 2011 жылдан бастап ұсынылып, шетелдік 14 ақпан мерекесіне балама ретінде насихатталып келеді.

Мерекенің негізінде қазақ халқының көне эпостық мұрасы – Қозы Көрпеш пен Баян Сұлу туралы жыр жатыр. Бұл аңыздың тарихы VIII–X ғасырлар аралығына дейін барады. Жырда екі жастың адал махаббаты, ата-аналар арасындағы уәде және тағдырдың қиын сынақтары баяндалады. Кей деректер бойынша, олардың әкелері достықтың белгісі ретінде балаларын атастырып қойған. Алайда кейінгі жағдайлар бұл уәденің орындалмай, оқиғаның қайғылы аяқталуына алып келеді.

Зерттеушілер бұл оқиғаның нақты тарихи тұлғаларға қатыстылығын дәл нақтылай алмайды. Себебі жыр ауыз әдебиеті арқылы ғасырлар бойы жетіп, түрлі нұсқаларға өзгерген. Соған қарамастан, Қозы мен Баян бейнесі халық жадында мәңгілік махаббат пен адалдықтың символы ретінде сақталып қалды. Бүгінде бұл күн тек тарихи аңызбен шектелмейді. Қазақстанның түрлі өңірлерінде мәдени іс-шаралар, жастарға арналған байқаулар мен концерттер ұйымдастырылады. Сонымен қатар көптеген жұптар осы күні неке қиюды таңдайды, бұл мерекенің қоғамда кеңінен қолдау тапқанын көрсетеді.

Қозы Көрпеш – Баян Сұлу күні ұлттық құндылықтарды жаңғыртудың маңызды үлгісі болып саналады. Бұл мереке жастарға өз тарихын тануға және қазақ мәдениетіндегі махаббат ұғымының терең мәнін түсінуге мүмкіндік береді.

Шынайы сезім, адалдық және уәдеге беріктік – бұл күннің басты идеясы. Сондықтан Қозы мен Баян туралы аңыз тек өткеннің мұрасы емес, бүгінгі ұрпақ үшін де рухани құндылық болып қала береді.

«Journiverse» білім беру орталығының оқушысы: Тұрсынтай Ерасыл