Тас көшеде – Самал Сарсенбекова

Қоқысты көше үй болып,
Қаңғыған итпен тілдесу.
Сусынды ащы сый көріп
Маскүнем болып күн кешу...
Көзіне қанды жас толып,
Тағдырға көп-ау наласы.
Көшеде жатыр мас болып
Өмірдің өгей баласы.
Ащы су болып жолдасы,
Өкпелеп барлық пендеге
Дірілдеп,тоңып қол,басы
Телміріп түскен теңгеге.
Қайғысын құйып кесеге,
Жапырақ жанын жастаған.
Бір адам жатыр, мас (жаман)
Қараңғы,тас көшеге
Тағдыры теуіп тастаған.
Тоңбайды жаны суықтан,
Өтпейді оған ызғар да.
Мәңгіге кеткен суып тән
Тағдыры берген ызғарға.
Сұмдық әлемнен тазамын,
Ешкімде жоқ бұл азаттық.
Маскүнем ұрттап арағын
Өткенді жатыр мазақ қып...