Үлкен сөзі – Еркебұлан Серімханұлы

Қадамдарың бастаған,
Берекесі жоқ деме.
Болашақты алаусыз,
Сөніп тұрған шоқ деме.

Сыртынан бір адамның,
Ғайбат айтып өртеме.
Тіліңменен өзіңді,
Күнәларға итерме.

Жамандықты көрместей,
Көздеріңді шілтерле.
Еденнен төмен түспестей,
Амал жазғың шекеңе.

Еңбек-адал,жүрек-ақ,
Болсын күнде егерде.
Болмашы бос істерге,
Уақытыңды өлтірме.

Жаса,оқы және жаз,
Оған мүлдем ерінбе.
Жұрт не десе о десін,
Кері қарай шегінбе.

Қате жасап шалынған,
Әрекетке өкінбе.
Қайта одан сабақ ал,
Баспа қадам керіге.

Қапты мені иттер деп,
Итті қаппа өзіңде.
Алтын сөзді қор қылып,
Ұқпайтынға түсіндірме.

Ұсақ түйек дүниеге,
Ойларыңды кетірме.
Жапалақпен қарғаны,
Ұстаймын деп секірме.

Алға қарай бас адым,
Орыныңды шегеле.
Шегелеген орныңда,
Құрметіңді кетірме.