Дауыс

Сәулесі күннің
Айдынын судың аймалап,
Сүңгіп бір шықты
Сұқсырдай сұлу айғабақ,
Дірілін жанның
Ақырын ғана аңдатып,
Таратып жатыр
Майда толқындар жаймалап.
Ақтолқын қуған,
Шығыстың қызы ақмаңдай,
Тұрды бір толқып,
Толқыннан бақыт тапқандай,
Күміс тамшылар
Шашырай ұшып шашынан,
Ойнайды ұшқын,
Айдынға маржан шашқандай.
Сыңғырлай күлді...
Сиқырлы шыны үніндей,
Таудағы құстың
Таласқан таңмен әніндей,
Суретші болсам,
Бейнесін тура келтіріп,
Жеткізем қалай
Дауысын,
Нәзік дірілдей?!
Жастық шақ қайран,
Қанатын жайған алысқа,
Алысты қойып,
Созатын қолын ғарышқа,
Ақсәуле күндер...
Ақтолқын күйлі көңіл-ай,
Ғашық боп қалған,
Сыңғыр да сыңғыр,
Дауысқа!

---