Көрші

Қыдырғали аға мен Алтынай тәтеге

Көршің жақсы
Болса кетпес тынышың,
Кеудең қысып,
Тарылмайды тынысың,
Жаман көрші
Жаныңды улар жалғанда,
Көшіп кетпей,
Қиын бірге тұрысың!
Көршілер бар,
Бір-біріне кірмейтін,
Кірмек түгіл,
Аты-жөнін білмейтін,
Кездескенде
Ернін жыбыр еткізіп,
Ту сыртынан
Сұғын қадап, тілдейтін.
Жақсы көрші
Тәуіріндей жақынның,
Ескермейді
Тәңірідей хақын кім,
Өмір қызық,
Ойда жоқта жаңа үйде,
Көрші болдым,
Әкесімен әкімнің!
Үлкен кісі,
Көпті көрген, жан-жақты,
Жылы жүзді,
Кішіпейіл, салмақты,
Қыдекеңнің
Құдай қосқан қосағы,
Алтын тәте,
Аяулы ана, ардақты.
Өмір серік
Қосағымен жарасып,
Қатарласып,
Қабағына қарасып,
Арасында
Қояды ептеп әзілдеп,
Пікірлерін
Талқыласып, таласып.
Әңгіменің
Шағады екен жілігін,
Сөз танытар,
Кім-кімнің де білігін,
Желтоқсанның
Ызғырығын еске алып,
Айыптайтын
Күштілердің қылығын.
Қаһарлы кез,
Қазағымды қыстаған,
Қолдарына
Темір таяқ ұстаған,
Қалың топқа
Тоқтам айтқан Қыдекең,
Болат жігер,
От намысты күшті адам!
Тағдыр жүгі
Кімге жеңіл, кімге артық,
Қазағымды,
Кеткен шақты, тым қарпып,
Еске алады
Қаны қызып тәтеміз,
Кіші жүздің
Қызы екенін аңғартып.
Ата-ананың
Еңбегі көп тер сіңген,
Баба жолын
Шығармаған есінен,
Орысшаға
Бейімделген балдарды,
Оңға бастап,
Қазақшалап өсірген!
Ойнайды екен
Және де ептеп шахматты,
Мен де білем,
Біразырақ ат – матты,
«Лениншіл жас»
Чемпионы болғанмын,
Ойнамақшы
Болдық талай жап-жақсы!
Сөйлеп кетсе,
Кеңге жайып қанатын,
Әңгіменің
Тереңіне баратын,
Көрген, баққан,
Өмір тарих ойға алып,
Шахматымыз
Ойналынбай қалатын.
Бұл өмірдің
Шүкір дейміз дәміне,
Бір партия
Шахмат бар әлі де...
Әкім бала
Сәлем берсе, ризамыз,
Ата-анамның
Көршісі деп қадірлеп!
Көршілерім
Жұбын жазбай сәнімен,
Келе жатыр
Махаббаттың әнімен,
Жан-жағында
Шүпірлеген балапан,
Жарасымды
Өмірінің мәнімен.
Алтын әже,
Әнге бөлен,
Тыңда күй,
Аман болып
Ойдағы мен қырдағы үй.
Шаттандырып
Немере мен шөбере,
Қолдай берсін
Қыдырғали,
Күнғали!
Өркеніңіз
Өсе берсін жарқырай,
Оларға айтар
Нақыл сөзің сарқылмай,
Төбеңізде
Күнің күліп, Қыдеке,
Жаныңызда
Нұрын төксін Алтынай!

---