Ақша бұлтқа тығылады Күн неге? – Танакөз Толқынқызы

– Ақша бұлтқа тығылады Күн неге?
– Ол не сонша? Үлде менен бүлде ме?..
...Жарығым-ау! Таласпаңдар жарықпен
Және жарық адамдарды күндеме.
Махаббаты жетеді оның маған да,
Махаббаты жетеді оның саған да.
Жарықтық ол жарқырауға жаралған
Жалғыз дана болғаннан соң ғаламда.
Біреу күннен жылынады ерте кеп,
Біреу күнге тығылады еркелеп.
Ери алсаң еріп кет сен жоқ болып,
Өртене алсаң, өзегіңді өртеп өт.
Өмір сүрем күндей алып көлеммен.
Күн секілді жарық шашып келем мен.
Алыспаңдар өшпейтұғын жарықпен
Таласпаңдар өлмейтұғын өлеңмен.