Әпкелерге

Өткен өмір өтті ғой, өткен елес.
Қазіргі бір жағдайым көктем емес.
Аға-іні ұмытып кетсе дағы,
Әпкем мені ұмытып кеткен емес.
Несіне өкпелейсің,
Аға шыным?!
Әрі бауыр, әрі аға, жанашырым.
Төрт әпкем шырылдайды төрт жағымнан,
Кеткенін сезбесін деп анасының.
Қыз жауһар,
Қыз жанашыр тілекті үміт.
Ұрсады адам бол деп білек түріп,
Үмітіңді ақтармын деп жылағам,
Анамның аппақ тасын тіреп тұрып.