Өлең, жыр, ақындар

Не қалар?

  • 22.12.2020
  • 0
  • 0
  • 1163
Бақтыбай жырау Жолбарысұлы (1842-1902) ізімен

«Дейді екен – ұсталардан дат қалады»,
Дат қалады, артында зат қалады.
Оған халық көненің көзіндей ғып,
Бұйымның асылы деп ат тағады.
«Дейді екен – жазып кеткен хат қалады»,
Хат қалады, ол елде сақталады.
Болашаққа үлгі боп сөз маржаны
Жалғасып ел аузында жатталады.
Адамның өмірі де тоқталады,
Тоқталады, дүниеден жоқ болады.
«Дейді екен – өлгеннен соң қабірінде
Саудырап сүйегің мен жақ қалады».

***
Қазағым бір бақытым – тілім деген,
Осы тілде – ғылым да білім деген.
Қанатын қанша кеңге жайғанымен
Тіл білмеген ешбір ер білінбеген.
Қазағым бір бақытым – тілім деген,
Осы тілде – сөзім де үнім деген.
Қасірет - қуанышын қатар көріп,
Осы тілде жылаған, күлімдеген.
Қазағым бір бақытым – тілім деген,
Осы тілде – ділім де дінім деген.
Ақ сүтпенен дарыған өнерімен
Төл тілінде жырлаған ұғымды өлең.
Қазағым бір бақытым – тілім деген,
Осы тілде – салт-дәстүр, ырым деген.
Тау-тасқа таңба болған тарихының
Осы тілде ұғынған сырын терең.
Қазағым бір бақытым – тілім деген,
Осы тілде сыналар мінім деген.
Тіл білмес келімсектер кемсіткенмен,
Бұл тілдің қасиеті бүлінбеген.

***
Сүйіп сені, болдым ғашық,
Сезіміңді аңсадым.
Сырымды да салдым ашып,
Саған ауды аңсарым.
Төзімді жеңіп құштарлық,
Тағатсыз сені ойға алам.
Түнде ұйықтаймын еске алып,
Таңда ойлап оянам.
Жас сезімді түлеткен,
Жаным, саған, арманым,
Жасыра алмай жүректен
Жыр жолдарын арнадым.

***
Өмір жолы жарыстардан құралған,
Мәресіне шақырады ол алдан.
Сол өмірдің жетелейтін төріне
Әрбір жанда бар мақсат пен сан арман.
Бұл жарыста кәрі де бар, жас та бар,
Мақсаттары құштарлықтан басталар.
Хас жүйріктер осындайда сыналар,
Топтан озып тарландарда бақ шабар.
Өмір – жарыс, ұзақ-ұзақ жолы бар,
Бағыттары – оңы және солы бар.
Бар мұратың – сын жолында адаспау,
Адаспаған іздегенге жолығар.



Пікірлер (0)

Пікір қалдырыңыз

Кеудемнен қуатты үміт тұғыр алды

  • 0
  • 0

Кеудемнен қуатты үміт тұғыр алды,
Шаштың кеп шуақ қылып шұғылаңды.
Ғайыптан кезіктің де тарам-тарам
Бағыттан көрсеттің сен құбыламды.

Толық

Пір Бекет ата немесе кедергісіз кеңістік һәм уақыт хақында

  • 0
  • 0

Дүнияуи ілімді біз анық деп жүрдік,
Мектептің оқулығынан қанық боп жүрдік.
Өлшемі қылып уақыттың кеңістіктегі
Ең жылдам құбылысты жарық деп білдік.

Толық

Маңғыстауым бұл менің...

  • 0
  • 0

Ғасырға ғасыр жалғап тарихы өткен,
Ежелден ата-бабам мекен еткен,
Әр ақыны атына жыр тербеген
Маңғыстауым – бұл менің Атамекен!

Толық

Қарап көріңіз