Әз Наурыз

Жер жаңарып сұлулықтың лебі есіп,
Күлімдеген Күн менен Ай теңесіп.
Төс қағысып кешіреді бір-бірін,
Кеткен жандар араздасып егесіп.

Наурыз деп жырлағанда жағым талмас,
Еш мереке онымен теңесе алмас.
Наурыз көже,бауырсақ сары майдың,
Татқандар тәтті дәмін ұмыта алмас.

Наурызым - көңіл-күйдің шамашырағы,
Биші қыздар мерекені жандырады.
Әншілер бұлбұлдайын күміс-көмей,
Ән шырқап ел айызын қандырады.

Бұнымен мерекеміз бітпек емес,
Қариялар жиналып құрар кеңес.
Қыз - жігіт алтыбақан тебіседі,
Бұл мейрамда болмайды ешбір егес.

---