Сенің арқаң

Тауы мен өрі қалқан,
Жерім де елі дархан,
Өмірге келгендігім,
Қойнында кені бар сан,
Бастырған мені балпаң,
Иә, Аллаһ, сенің арқаң.
Ұлы боп көшпендінің,
Ұлан боп өскендігім,
Бақытым бүршік жарып,
Өкініш өшкен мұңым,
Дегенім «сенім артам»,
Иә, Аллаһ, сенің арқаң.
Қатені «қой!» – дегенім,
Тапқаным ой кененін,
Мойындап құлдығымды,
Шүкір деп сөйлегенім,
Рухымның шөлі қанса,
Иә, Аллаһ, сенің арқаң.
Орнатсам діл бекімді,
Жалғасам тілге тілді,
Қалыпты адам болып,
Атқарсам міндетімді,
Өмірді тегін алсам,
Иә, Аллаһ, сенің арқаң.
Ғаламның мыңнан бірі,
Жер шары тұрғандығы,
Ту ұстап Қазақстан,
Елдігін құрғандығы,
Атқаны келіп әр таң,
Иә, Аллаһ, сенің арқаң!

---