Қабыл ал қазақ сәлемін

Ортаңа жаңа келсем де,
Емеспін жай бір таныс жан.
Туысым, досым қадірмен,–
Деп іздеп келдім алыстан.
Қазанның жұрты, қабыл ал
Қазақтың ыстық сәлемін!
Өлкемнің байтақ
есімі
Шарлаған дүние әлемін.
Ақ басын иіп Алатау
Сәлем! – деп қалды көл бұлғап,
Сәлем! – деп қалды Алматы –
Алмалы әсем жасыл бақ.
Жалынды ыстық сәлемін
Паш етіп туған халқымның.
Өлкеңе еріп бізбенен
Келіпті ашық алтын күн.
Қазанның жұрты қабыл ал
Сәлемін достық ниеттің.
Алматымның ыстығын
Жырыма орап сый еттім.

---