Перiште пейiлiндей пешенелiм – Исраил Сапарбай

Перiште пейiлiндей пешенелiм,
Ұйқымды шəйдай аштың неше менiң...
Кездесiп тұрайықшы кешкi əлетте
Жонында Көктөбе мен Көсегенiң.
Кездесiп тұрайықшы демiл-демiл,
Емiнiп, еншiлесiп ерiнге ерiн...
Есiмнен жатсам-тұрсам шығар ма екен
Кербезсiп керiлгенiң, ерiнгенiң...
Есiмнен шығар ма екен тəттi өбiсiң,
«Iздеген – сұрағанға» тап келiсiң?!
Ла-Макан лəззатыңа не жетедi,
Жаралған жан болсаң да «əттең...» үшiн!
«Əттең-ай, əй, əттең-ай, əттеңайлап»
Артыңда көкемай мен көк тоғай қап,
Алдыңнан шыға келер əлем-жəлем
Шайынып таң нұрымен жатқан аймақ...
Үй бары, еске түсiп бала бары,
Жаныңды жегiдей жеп жар амалы..,
Есiктен төрге озып жантаярсың
Жадыңнан шығара алмай «жан ағаны»...