Алыптарды аңсау

...Кеудемде менің бір шам бар
Мың өшіп, күнде мың жанған.
Жанымда менің жүр шалдар
Құлқына ары құлданған.
Мақтауға кімді лайықтап,
Даттауға кімді шамам бар?! –
Алыптар көзден ғайып боп,
Ақылға қалса сараңдар.
Жұлдызды көктің заңғары
Жұртым-ау, қалай жұтаңдар?
Сары алтын сөздің сардары –
Қайдасың, қайран, Мұқаңдар?!
Балтəтті тұмам тартылып,
Басымнан бақыт ауғасын,
Бабамның салты сарқылып,
Саудаға түсті-ау сау басым.
Көңілімді қайтем шүкіршіл,
Көк түтін жұтса қос өкпем?
Құлагер қайдан құтылсын
Батыраш – бақай есептен?!
...Жалғанда мынау мінəйім
Мен күткен жарық осы ма?
Құдіреті күшті Құдайым,
Нысап бер кəрі-жасыңа...

---