Жылқыасқан

Тіп-тік кезең әйгілі Жылқыасқаным,
Өзіңе арнап сағынып жыр бастадым.
Бауыры дауыл, үсті жел, ерге қанат
Көргенім жоқ мыңғырып жылқы асқанын.
Тіп-тік кезең әйгілі Жылқыасқаным,
Арнасам аз өзіңе жыр дастанын
Әліппесін қолтықтап бір қаршадай
Жетім қыздың көргенмін күнде асқанын.
Үсті боран, бауыры жаз Жылқыасқаным,
Шындарыңмен есімде сырласқаным
Жылқыасқаным, өзіңді күнде асқаным!
Болашаққа екен ғой бір басқаным.
О, туған жер, сен десе ой толқындайды,
Жетелейді қиялды қолтықтайды.
Сан асулар, кезеңдер сенен соңғы
Жылқыасқаным, өзіндей толқытпайды.

---