Жол жатыр Мұхтар жазған, Абай салған

Жол жатыр Мұхтар жазған, Абай салған,
Атойлап аңғарғанға тұрады алдан.
Үңіліп терең барлап түсе алмаған
Жүреді көкірегінде түйіп арман.
Түсетін жол осы еді-ау жас ұрпаққа,
Тәуелсіз ел боп шалқып шыққан шақта.
Беу дүние, өнер құсын торға қамап,
Кез болдық нарық деген қайтқан баққа!..
Ілгеріге жетелейтін,
Жан азығым таусылды.
Жұртың үшін шырылдаған
Кім естиді дауысыңды!
Жақсылықтан күдер үзіп,
Жан жүрегім жаншылды,
Келер ме екен дейтұғын күн
Көңіл бұлттан аршылды.
Шақ болады ерекше жанға жайлы,
Көрінетін сол сәтте таңғажайып.
Аңсағанда алауы ақылды алар,
Оралуы екінші алмағайып.
Билеп алып ырқыңды ес аудыра,
Ауыздықсыз тәрізді асау құла.
Шығып кетер шығындап ала қашып,
Шалыс басу дегенің осы-ay сірә.

---