Армысың

Армысың әйгілі әсем Қарқаралы!
Бауырынан өнер өрген сан салалы.
Ән кектеп, күй қаулаған құнарлы өлке
Ұлылар ту тіккен жер Арқадағы.
Армысың, нұрлы Нұра, сұлу Талды,
Есімің естігенде-ақ есте қалды.
Айтулы Қояндының жәрмеңкесі
Деген де бала күнде-ақ құлақ жарды.
Қазыбек қаз дауысты, Бұқар жырау,
Кім еді деп бір қазақ бермес сұрау.
«Әнді ерттеп, күйді мінген ел» осынау
Даңқына келе жатыр түспей қылау.
Шешендік сөз бұлардан мирас қалған,
Тыңдаған рухтанып, ғибрат алған.
Әлемнің шешендерімен сайыс құрса,
Тұрар еді оқ бойы озық Цезарлардан.
Мәдиді Жүсіпбектер жалғастырған,
Дәстүрді кейінгілер алға асырған.
Әбікен күйі, Қасым өлеңдері
Өлмеуін бүгінгі ұрпақ қамдастырған.
Үйреніп Жүсекеңнен Мәди әнін
Түсініп қыры-сырын, ашып мәнін.
Шырқадым шетелдерде, ұйып тыңдап,
Алғысын, аямады алақанын.
Зерттедім, зерделедім Қасым жырын
Ғалымдар қолға алмаған менен бұрын.
Докторлық диссертация қорғадым,
Ақтара ашып кепке талант сырын.
Сондықтан сіздерге емен мен де бөтен,
Буғанмын әр қиынға белді бекем.
Қаламым қолдан әлі түскені жоқ.
Қасымша халық күйін жырлап өтем.
Ақынын ардақтаған өнегелі ел,
Жақсысы жапырақ жайған игеріп төр.
Көбейсін Қасым жолын жалғағандар.
Мерейің асып, толып өркендей бер!

03.09.2001 жыл.

---