Несіпбек Айтұлы

Жүрегім менің бұлқынды

Бұл бетте «Жүрегім менің бұлқынды» атты Несіпбек Айтұлы жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

22.09.2021
0
0
1269

Тәтті ғой өмір адамға,
Татпаған дәмнің бәрі – арман.
Жүрегім менің әманда
Бұлқыну үшін жаралған.
Жүрегім менің бұлқынды
Арайлап әр таң атқанда.
Жаныма нәзік жыр тұнды
Кірпігін гүлдер қаққанда.
Жүрегім менің бұлқынды,
Көгалға аунап көктемде.
Құбылып әлем мың түрлі,
Нөсерлі жаңбыр төккенде.
Жүрегім менің бұлқынды
Өзенді көріп тулаған.
Ағынмен алға ұмтылды,
Толқынын атты су маған.
Жүрегім менің бұлқынды
Жусаннан жұпар жұтқанда.
Сағымды көріп сиқырлы,
Тауларға биік шыққанда.
Жүрегім менің бұлқынды
Қыранның көріп қанатын.
Сапырып судай бұлтыңды,
Шарықтап, шайқап алатын.
Жүрегім менің бұлқынды
Тұлпардың көріп тұяғын.
Ашып бір шайдай ұйқымды,
Самғады сансыз қиялым.
Толқытар ойлар мың қилы,
Армансыз әсте күн бар ма?..
Жүрегім менің бұлқынды
Анамнан алғаш туғанда.

1969

Несіпбек Айтұлы жүрегім менің бұлқынды Несіпбек Айтұлы өлеңдері

Пікірлер (0)

Пікір қалдырыңыз

Жиі қойылатын сұрақтар