Ана дауысы

Құлыным­ау, анашың қалды қайран,
Естідім деп осынау әнді қайдан, әнді қайдан.
Шырқалғанда «Жас қазақ» сені ойлаймын,
Көз алдыма елестеп қанды майдан, қанды майдан.

Қайырмасы:
О, адамдар,
Оқ атпаңдар!
Аналарды
Жылатпаңдар!

Күнде көрем өзіңді түсімде мен,
Сені көрсем, бақыттың құсын көрем, құсын көрем.
Жан бар ма екен осынау тіршілікте,
Қасіретін ананың түсінбеген?

Қайырмасы.

Ел іргесі қашанда болсын аман,
Тілегімді, тәңірім, берші маған, берші маған.
Дүниеден армансыз өтейін мен,
Жер бетінде бар болсаң, келші, балам, келші, балам!

Қайырмасы.

---