Сыйлық

Мынау өмір мәңгілік кімге көктем,
Өз әмірін жүргізер күндер өктем.
Досым, туған күніме гүл сыйладың,
Еске салып жастықты гүлдеп өткен.
Өмір жайлы оңаша толғанам көп,
Тіршілікке қалайда жалғанам деп.
Ұлым, туған күніме шам сыйладың,
Жағатұғын шамыңды мен болам деп.
Аласаға қайтемін, қарап, күндеп,
Уақыт алға қояды талап, міндет.
Қызым, туған күніме қалам бердің,
Қаламыңа талмайтын қанатпын деп.
Келер күнге үмітті артамын көп,
Аймалардай бетімді әр таңым кеп.
Дірілдедім, толқып бір күбірледім,
Мен сендерге қандай сый тартамын деп.
Аспанымды ашып бір ашылмаған,
Құшағын кең жайғандай жасыл далам.
Көгердім деп көңілімнің көктемімен,
Көктемімді сыйладың, досым, маған.
Көңіл – дәптер парағы сызылмаған,
Елестетер пәктікті бұзылмаған.
Сұлулықты сен маған сыйладың деп,
Құс қанатын сыйладың, қызым, маған.
Сезім кештім бақыттан алаулаған,
(Көз ілмеспін уақыттан әлемге алаң).
Жарық күнді сыйлаған анашым деп,
Жарық шамды сыйладың, балам, маған.

---