Жандым, өштім, өртке айналдым, сезбедің

Жандым, өштім, өртке айналдым, сезбедің,
Арашалап ала алмадың, төзбедің.
Мен өзіңді теңер болсам семсерге,
Жарқылдадың қолдарында өзгенің.
Өзім үшін жан жоқ саған келер тең,
Бір сәт еске ап, ұмытарсың мені ертең.
Жарық күнде жүрсем нәзік мұң болып,
Көкірегіме түсер сенің көлеңкең.
Кезім өткен мас болатын сезімге,
Сезім, сезім тұтқындалған төзімге.
Ана-жердің құшағына енерде
Сенің бейнең кетер менің көзімде...

---