Хайп қуғандарға

"Хайп қуғандарға"

Интернетпен талай жүр бағын ашып,
Көрсем болды аяймын жаным ашып.
Ұлтты бұзып барады ұялмастан,
Хайп үшін шешініп тәнің ашып.

Жүйкесіне тиетін қанша адамның,
Қаптап кетті жалған батыр, жалған ақын.
Не мақсаты екен деп ойланамын,
Бір өнеге таппаймын тамсанатын.

Қуанады өзгеге мазақ болса,
Қайғырады қаралым аз-ақ болса.
Түсінсеңдер жасамас едіңдер-ау,
Тренд соңы апарар тозақ болса.

Қате қадам өзіне еш байқалмайды,
Ерсі болса халықтан жай қалмайды.
Ата-анаң балам деуге аузы бармай,
Ал перзентің "әкем" деп айта алмайды.

Бейшара боп бәрі де қор болады,
Қоғам үшін сайқымазақ сор болады.
Бүгініңе бұл ісі бақыт шығар,
Ертеңіне бірақта ор болады.

---