Қатайтты сені, бәлкім, өмір білем

Қатайтты сені, бәлкім, өмір білем,
Жас өндір жігіттердің көңіл гүлі ең.
Сезімің селк ететін сәл нәрседен,
Аққудың айдындағы көгілдірі ең.
Ақ айдын дір ететін қанатыңнан,
Сұлудан сүйкімді едің дара туған.
Кім білсін кеттің бе екен толып бүгін,
Аспанның нәзік айы ең жаңа туған.
Сол күйі елестейсің досқа әлі сен,
Сыңсыған жағаның көк жас қамысы ең.
Бүлдіріп көп қарасам алатындай,
Мен саған көп қарауға жасқанушы ем.
Әлде бір атқан таңнан бақ сұрадың,
Тасытып арманының ақ бұлағын.
Айттың ба аққуларға қосылып сен,
Бірге айтқан бір кездегі гәкку әнін.
Қатайтты сені бүгін өмір, білем,
Алқызыл таңда ашылған көңіл гүлі ең.
Селк етіп сәл нәрседен жасқанатын,
Аққудың айдындағы көгілдірі ең.

---