Өлең, жыр, ақындар

Өр Алтай

  • 31.12.2021
  • 0
  • 0
  • 982
Тіршілік пен әсемдік ұғысқалы –
Бір шынар асқақ Алтай шығыстағы
Тербеткен кеудесінде кенді өлкені
Жер-Алып алтын бесік тыныстады.
Алтынын күмісі мен салмақтаған,
Билік пен заман көші... алмасты адам.
Байлығын қорқаулықпен игеруге,
Кезі жоқ жатжерлік те жармаспаған.
Жағадан су сапырып, алтын сүзген
Келімсек ағылшын да жортты түзде.
Бұл жайлы жылнамалар сыр айтады,
Мұрағаттың әр беті мұңайтады...
Жайлаудан қонысына қайтқан қазақ
Патшадан мұрсат сұрап, арыз жазады.
«Билет ал» деп, өз жерінде кіріптар ғып,
Жалгерлік ақы кесіп, пұлын алады...
Ойым жоқ тарихты түгел жазбақ,
Өткеннен бір үзік сыр шерттім аздап.
Шығыстың шынарына таңдай қаққан
Білсін деп бұл жайды да әрбір қазақ.
Өскемен – өскен елдің бір үлгісі,
Қара Ертіс, қатар аққан Ақ Үлбісі.
Суына сүт қосқандай деп сүйсінер
Буырқанған бастауын көрген кісі.
Қойнауы тұнған асыл – алтын, күміс,
Беткейі балқарағай ашқан тыныс.
Шалғыны маралына болған өріс
Өр Алтай теңдесі жоқ құтты қоныс!
Шығысым – Шынарым деп құтты мекен,
Жырыма жүрекжарды өзек етем.
Тұмасы ер Рахманның шипасы ерек,
Марқакөл атың аңыз - толған дерек.
Марқакөл атың аңыз - толған дерек,
Жиырма жеті өзеннен алған қорек.
Бойына тоғыстырып, алған нәрін
Қалжырға – жалғыз өзен жиып береді.
Өр Алтай табиғаттың тұлымындай,
Қос өзен Баян сұлу бұрымындай.
Өскемен – шығыстағы алып тұлға,
Қазақтың омыртқалы жұлынындай!
Талай жұрт көкейінде көксейді екен
Көрмеген Жер жәннатын ғұмырында,
Оралхан өмір бойы іздеп өткен
Аңсатқан сол бір қасқа құлынындай!



Пікірлер (0)

Пікір қалдырыңыз

Сені аядым...

  • 0
  • 0

«Бөлшектенсе, жан-дүние бөлшектенсін,
Көрінбесе, кім оны өлшеп көрсін,
Түгел болсам сырт көзге, болды» - дедің
Жұрттың көзін өзіңе өлшем көріп..

Толық

Сен қарама, жан досым, пендешілік көзіңмен

  • 0
  • 0

Сен қарама, жан досым, пендешілік көзіңмен,
Сүйе көрме мені еш күлді-көмеш сезіммен,
Ол шеңберге сыймаймын, ауқымдырақ өлшеммен
Жаратылған ғаріппін, пенделіктен тарықтым...

Толық

Жалғыз жалбыз...

  • 0
  • 0

Арна жатыр тартылып, суы құрғап,
Кеше ғана кемерге сыймай тұрған.
Көпір салып қойыпты, атын жазып
«Құрғақ өзен» аталып, көзі құрыған.

Толық

Қарап көріңіз