Жерұйық

Ауыр салмақ басқанда ер иығын,
Адастырып кетеді пері-құйын.
Аралап аспан астын,
Жердің жүзін
Асанқайғы таппаған жерұйығын.
Ақкиізтоғай! Жерұйық сенде ғана,
Жын қуып, жыр іздеген мен де бала.
Көңілдің кірі кетті, денем сергек
Шайынып шыққандаймын Жемге жаңа.
Сені таптым!
Жоқ, Өзің таптың мені,
Қатайтты қабырғамды Хақтың белі.
Айтқаным : сенің сөзің, сенің жырың.
Шаш қойып, қамшы ұстап, ат мінгелі,
Ауылым,
Айналайын арда мекен,
Өлгенше өлеңімді арнап өтем.
Қасыңнан қарға адым жер ұзамастай
Кіндігім нық байланып қалған екен...

---