Тізбегі құстың ғажап ұшқанда

Тізбегі құстың ғажап ұшқанда,
Жетеді сыңсып сазы алыстан да.
Көмкеріп бидай кең дала төсін,
Қараша келді Қазақстанға.
Қараша келді, қараша келді,
Сары түк басты аласа белді.
Қозы-лақ тойып, секіріп көкке,
Енесін еміп таласа берді.
Алтын түске еніп қарады аймақ,
Бұрқылдап сыртта самауыр қайнап.
Симфония айтты оркестр тілі,
Серпіліп қала, дала бір жайнап.
Қызықпен жүрміз келте етіп түнді,
Елең қылмастан кем-кетік мұңды.
Сырнай сазына үн қосып едім,
Қамыстың басы селт етіп тынды.
Көз жасын жаңбыр төксе түлеген,
Құшағын жайды көкшатыр емен.
Жапырақ ұшты, құс ғайып болды,
Осынау байтақ Қазақстанда
Қараша ғана өкше тіреген.

---