Өлең, жыр, ақындар

Сырдария

  • 17.01.2022
  • 0
  • 0
  • 706
Сәлем бердім,
Сұлу Сыр,
Ізетпенен,
Сағынышымның
Моншағын тізбектеген.
Жыл құсындай
Жыл сайын қайта оралып,
Жыр маржанын
Өзіңнен іздеп келем.
Ұнайтындай өзіңе – еркелігім,
Толқындарың
Сырлы саз шертеді мың.
Туған жердің
Қарсы алып арай таңын,
Келіп тұрмын жағаңа ерте бүгін.
Арман қуып,
Тәтті ойдың жетегімен,
Бала болып
Бір сәтке кетемін мен.
Андағайлап
Жан-жақтан жармасады,
Тентек желің
Жұлқылап етегімнен.
Санамашы
Мені енді жатқа бүгін,
Саған деген
Қылаусыз ақ көңілім.
Толқыныңмен
Алысып өскен ем ғой,
Бұрымымды тарқатып ақ көбігің.
Ойхой, шіркін!
Бір аунап құмдағыңа
Еніп кетсем бір сәтке жыр-бағына.
Қайта оралса
Бал татқан балалық шақ
Кейін қарай шегініп жылдар мына...
Бұл өмірден
Демеймін кенже қалғам,
Таусылар ма, сірә да, мендегі арман?
Аңсап келдім,
Сұлу Сыр,
Құшағыңды аш,
Балалықтың базарын сенде қалған...



Пікірлер (0)

Пікір қалдырыңыз

Біз екеуміз

  • 0
  • 0

Жадыра Дәрібаеваға
Қолға қалам алғанбыз,
Жыр отына жанғанбыз.
Ақ арманға қол артып,

Толық

Кеудемнен аққан

  • 0
  • 0

Кеудемнен аққан
Алысып сезім селімен,
Жеңе алмай сорлап,
Толқынға қайта көмілем.

Толық

Жұп емеспін

  • 0
  • 0

Жұп емеспін,
Сыңармын,
Жалқы тұрған шынармын.
Пешенеме берілген,

Толық

Қарап көріңіз