Менің Отаным

(аударма)

Отаным менің - ормандар,
қырандар, мәңгі қорғандар,
шаналар зырлап ақ қарда,
ақ ұлпа қарлы ақпанда
түтіні кеткен аспанға
сабанмен жапқан кыстаулар!
Отаным менің - отты Күн,
көтерген көкке шоқтығын,
сәулесі жерге құйылған,
нәр алған содан қиыр маң.
Даласы - жұпар
дерт емдер,
кеңдігі -
шаршап жетер жел,
үңгірін қардан сайлаған,
аюлар маңғаз жайлаған
мәңгілік мұзды мекендер.
Жұлдызды көктен Ай қарап,
нұрымен жерді аймалап,
гүлдерді, белді сағымды
үмітке бөлеп жаныңды
жетелер алғы ақ таңға,
осында арман бақтар да.
Шапағат шашып таңдарым,
жаныңды баурап арман-үн,
бақыттың байтақ аймағы,
жандары жарқын жайдары
мінгендей қиял тарланын.
Шаттыққа толы жан-жағым.
Отаным менің - жылдарым,
қалалар өскен құмдарым,
ағындар аққан шөлдерім,
жанаттай жұмсақ жөргегім,
қар басқан құзар шыңдарым.
Отаным - сансыз шамдарым,
дастарқан толған нан-дәмім,
Отаным - байтақ орманым,
алысқа тартқан жолдарым,
Отаным менің - гүл белдер,
жайқалған мынау тың жерлер!

ВЛАДИМИР ЦЫБИН