Қиялдағы бақытты күн

Бүгiн мен
Дүниеге симай
Шалқып тұрмын.
Қорғасындай ерiп,
Балқып тұрмын.
Бiр қолыммен
Сарыарқаның жонын сипап,
Бiр қолымды
Алатаудың иығына
Артып тұрмын.
Аспанға зорға сиып, –
Қанатыммен жел тұрғызып
Ұштым.
Атырауды көтерiп ап
Жуындым.
Балқашты көтерiп ап
Iштiм.
Аспанның шамдарын
Жерiме әкелiп
Жағып қойдым.
Ауыл мен қалаларымды
Орден мен медальдардай –
Жарқыратып! –
Даламның омырауына
Тағып қойдым.
Алтын Күн мен
Күмiс Ай
Бойыма нұрларын
Құйып тұрды.
Ақша бұлттар
Сүттей аппақ боп –
Дәл төбемде! –
Ұйып тұрды.

---