Астамға

Жұрт жемегендi жеп,
Жұрт iшпегендi iшкендей;
Аллатағаланың
Кiндiгiнен
Домалап түскендей
Неге астам сөйлейсiң?
Бұл байлық
Қай атаңнан қалып едi?
Қай атаң
Мұның бәрiн
Үрiм мен Қырымнан
Алып едi.
Басқаны көзiңе iлмей
Адыраң-адыраң қарап,
Одыраң-одыраң етесiң.
Бұтыңды бұт,
Қолыңды қол етiп, –
Қағаздай қиқалап
Жыртып тастаса
Не етесiң?
Құрып кетесiң!
Көзiңе қара!

---