Түнгі тұман

Қалың тұман ішіндегі
Алып Алматы
Алатауды жастанып
Түс көруде.
Саңлау, тесіктерден
Сырадай қою
Тұманның дымқыл демі
Ішке енуде.
Қоюлығы сондай
Жуардай бетіңді.
Тұманнан шығып,
Тұманға кіріп жатқан,
Анда- санда көрінген,
Елес сияқты адамдар
Сол бір түстің
Кейіпкерлері секілді.
Қарашы,
Тұман да шебер-ақ:
Бағанадағы шамдар
Кішкентай бүлдіршіндердің
Қағазға салатын
Кішкентай- кішкентай
Сарыала күні сияқты
Әдемі-ақ.
Ілуде бір-ақ болатын
Ғажап түн еді!
Түс көрген Алматы
Арықтардағы
Сулардың даусымен
Сылқ- сылқ күледі.
Қаншама жылдар
Шаршап-шалдыққан
Айқай, шулар мен
Әрнеден —
Алматының
Мұндай ұйқысын
Көптен көрмеп ем.
Алматы осылай
Алаңсыз тыныстап жатса
Мына тірліктен
Риза болып кетермін.
... Сонан соң
Ұйқыдағы алып Алматы
Оянып кетпесін деп
Ақырын ғана жатып
Көрпемді бүркеніп жөтелдім.

---