Болатын оқиға

Психологиялық өлең

Осы бір зұлым
Жасарын жасады,
Асарын асады...
Ғұмырында
Қаншама қиянат пен
Қаншама зорлық жасады.
Қоймады!
Тоймады!
Ойласа—
Қарақан басы мен
Жаны үшін ойлады.
Тойласа—
Қан ішіп тойлады.
Зорлықтан
Жұрт біткен қорықты.
Жұрт біткен торықты.
Сол жанға
Бір сөз айтуға
Бүкіл ел қорықты.
Мына дүние
Кепкен терідей
Тырысып барады...
... Күндердің күнінде
Сол бір жан
Тағы бір
Зұлымдық жасап—
Масаттанып! –
Айнаға қарады.
Дүние дүрлігіп,
Азынап жел тұрды.
Сол сәтте
Өзінің айнадағы бейнесі
Оның зұлымдығына
Шыдай алмастан
Айнадан атып шығып
Оны бассалып
Буындырып өлтірді.