Театр

Бүгінде
Бүкіл Ғажапстан елі
Алып бір
Театрға айналды.
Елдегі жұрттың
Бәрі де актер:
Біреуі айлалы,
Біреуі байлаулы,
Біреуі қайраулы,
Біреуі айдарлы,
Біреуі айбарлы...
Тағы да біреулер жүр —
Қайдағы-жайдағы...
Басы басталып,
Аяғы бітпейтін
Траги-комедиялық
Спектакль жүріп жатыр.
Бір актер жылап,
Бір актер күліп жатыр;
Біреуі сиыр боп мөңіреп;
Біреуі
Ит болып үріп жатыр;
Біреуі
Қоқыс ақтарған бейшара,
Біреуі
Өз жерін өзі жаулап
Тоз-тозын шығарған
Триумфатор.
Көздері алақтап
Шетелдік біреулер жүр —
Спектакльге
Өлермен боп...
Апыр-ай,
Жұрттың бәрі де
Актер боп кеткен.
Бірақ та
Бір түйір
Көрермен жоқ!
Декорациясы:
Асты-үстіне шығып
Шашылып жатқан
Тоналған жер;
Тартылған көл,
Қуарған шөл,
Өртенген
Орман мен бел...
Массовкадағы миллиондаған актерлар
Бірде олай жүгіріп,
Бірде былай жүгіріп
Кеткендей —
Көктегі бұлт пен
Таудағы көшкін боп...
Басты рольдегі
Ең басты Актерің
Таңнан кешке дейін
Монолог айтады...
Бірақ бәрібір
Оны тыңдайтын ешкім жоқ.
Спектакль тоқтар емес...

---