Өсекке ода

Оған тең келмес
Қандай бір таралым да...
Ол бүгінде —
Ешқандай құралсыз-ақ! —
Ауызекі, ауызша
Миллиондаған
“Тиражбен” таралуда.
Оған түк емес,
Жапан түз, қиырың да...
Автобустарыңа да,
Пойыздарыңа да,
Ұшақтарыңа да
Кірген-шыққанмен,
Ұялы телефондармен
Үздіксіз құйылуда.
Ең бір күштімен де
Тең тұрып
Сөйлесе беретін
Өрелісін-ай,
Кім-кімді де
Арбап жіберетін
Қызыл-жасылды әлемішін-ай...
... Мына бір өсектің
Күніңді қараң етердей
Қап-қара бұлттай
Түйілуін-ай.
Мына бір өсектің —
Тәттілігі сондай! —
Таңдайыңды тамсантып
Үйіруін-ай.
Мына біреуінің
Бұзығын-ай...
Әне біреуінің
Қызығын-ай...
Әне біреуі —
Оқ сияқты —
Әлдекімдерді жаралап жүр.
Мына біреуі —
Үкімнен бетер! —
Ақ адал адамды
Қаралап жүр.
Ұлы мәртебелі
Өсек ханымға
Бар есік ашық қой:
Парламент дәліздерін де,
Ақорда кабинеттерін де
Сылаңдап аралап жүр.
Аты Өсек болған соң
Бәленің бәрін
Ұғып тұрады.
Бәленің бәрін
Біліп тұрады.
Басқасын былай қойғанда
Темірбетонды! —
Түрмелеріңе де —
Ешқандай кедергісіз! —
Кіріп-шығады.
Апыр-ай,
Оның да соңынан —
Сығалап! —
Күдік пен Сезік жүреді.
Өсек оны неғылсын!
Өйткені ол
Сөз бостандығы тұсаулы
Елдердің де
Қуыс-қуысына кіріп,
Тамыр-тамырларын қуалап
Желдей есіп
Кезіп жүреді.
Неткен еркіндік!

---