Құсырып жауды жеңген күн

Қақаған қарлы боранда
Қарулы ерлер тонар ма,
Қазіргі қанды майданда
Жауынгер біздің ұлдарға
Қарлы аяз бөгет болар ма!?
Еске алсам өткен заманнан
Болған кезде қан майдан
Батырлар жауын қиратқан,
Денесін аяз ширатқан,
Суық күн серік оларға.
Сұраншы батыр сүңгісін
Сілтеп жауға шын күшін,
Мұртына мұз қатса да.
Белшеден қарға батса да,
Ойран салып дұшпанға,
Қырандай ұшқан сонарда,
Халқының арын ту қылып,
Жау апшысын қуырып,
Қылышын қыннан суырып,
Ер Кутузов, Суворов
Боранды мұздан қайтпастан,
Ат құйрығын түйгенде.
Тайталасып жүргенде
Табаны ердің таяр ма!
Соларға тартқан жас ұрпақ,
Жаудан қайтпас тосырқап,
Қиқулап жауға тигенде
Жауған оққа қарар ма!
Еске алсам кәзір соғысты,
Отанға тиген фашисті
Қарулы ерім қайтарып,
Жаудың күшін тойтарып,
Дұшпанын кейін шегініп,
Қанын судай төгілтіп,
Жалтартпастан қуалап
Мінді күшті қаһарға.
Жауынгер туған ер ұлдар
Жауынан кегін тағы алар,
Батыр бол сын дегізіп,
Ақ сүтін жастай емізіп,
Тастүлектей талпынтқан
Оларды талай аналар.
Анасы жастай тербетіп
Өсірген бала ержетіп,
Аттанғанда майданға,
Сүйсінбес оған қай ана,
Олардан кім аянар!
Қамы үшін талай ұлының
Тігіп жылы киімін
Жіберіп жатқан күнбе-күн
Алуан-алуан ана бар.
Ерлердің туған елінен
Кенелген кенге жерінен
Құрыш қорытып қайнатқан
Ордалы кеннің төрінен
Құрсанып қару жасаған
Құрыш құйған дала бар.
Елге шапқан жаулардан
Аранын ашқан айуаннан
Сақталсын деп астана,
Сақталсын деп жас бала,
Сақталсын деп тұлғалы ел,
Сақталсын деп туған жер,
Құрту үшін фашисті
Жаумен ерлер белдесті.
Майданнан кім жан аяр,
Қырандар біздің ұшқан күп
Қаусырып жауды қысқан күн,
Тырнағынан дұшпанның
Құтқарыла бастады
Талай дала, қалалар.
Жүректі туған жас ұрпақ
Майданнан қайтпас тосырқап,
Түтеген оқтан тартынбай
Жай оғындай жарқылдай
Қастасқан жаудан қан алар.
Нажағайдай атыла,
Жау жендетін жапыра,
Көк пен жерді қаусырып
Жаудан күшін асырып
Жеңістің ұлы таңы үшін,
Отанының ары үшін,
Қыран құстай талпынған
Жас ұрпақтың ер туған
Әрбірі мыңға бара - бар.

---