Келін болу

Келін болу

Келін болу - мүлдем басқа күйге ену,
Танымайтын, жаңа ортаға үйрену.
Еркелікті, тік мінезді сындырып,
Үлкендерге қызмет ету, имену.

Келін болу - дауысыңды бәсейту,
Өз-өзіңді қамшылаумен есейту.
"Анашыма сөз келмесе екен" - деп,
Білгеніңді көркемдікпен паш ету.

Келін болу - жұбай болу сабырлы,
Тәрбиелеу қиындыққа жаныңды.
Сені толық білмейтұғын адамға​ -
Жолдас болу, нанымды әрі жағымды.

Келін болу - ана болу тәлімді,
Тәрбиелеу жас ұрпақты жалынды.
Ана тілдің бар құнарын сіңіру,
Елін сүйген ер өсіру қадірлі.

Келін болу - абыройлы зор міндет,
Сен білмессің өзің жайлы,​ ел біледі.
Сөз аңдыған арзан әйелге айналсаң,
Сен жайлы да "өсекші"- деп,​ сөз жүреді.

Келін де бол, ана да бол, бол дана,
Жақсылықтан өзге жолды таңдама.
Құрсағыңда ертеңі бар елімнің​ -
Мына елдің болашағы сен ғана!

17.01.2021

---