Жас жұбайларға – Гүлмекен Қасенбай

Сендер бүгін серт бердіңдер айнымас,
Жас жұбайлар тәтті өмірге қадам бас.
Ойларыңа орнатсаңдар сүзгіні,
Некелерің тас қамалдай болар рас!

Азғырушы азғырса да күні-түн,
Берілмеңдер, қорға көңіл шынысын.
Ерің жайлы жаман ойға берілме,
Ер азамат — бағың және ырысың!

Келіншегің — берекесі үйіңнің,
Сезімінен қызу ал да, жылынғын.
Қорлатпа оны, жылатпасын еш адам,
Анасы ол — болашақ ұл-қызыңның!

Бір-біріңді қадірлеңдер сыйласып,
Бір-біріңе мәңгі болғын шын ғашық.
Түсініспей, ренжіспей тұрғанда...
Жиі-жиі сөйлесіңдер, сырласып!

Бір-біріңді аялаңдар, қорғаңдар,
Жаман сөзбен өсектеуші болмаңдар.
Енді екеуің бір бүтінсің, отансың,
Бөгделерге әсте назар салмаңдар!

Құпиясын шаңырақтың сақтаңдар,
Бір-біріңді мақтап жиі ақтаңдар.
Пендеміз біз, қателікке бейімбіз,
Бір-біріңе ауыр кінә артпаңдар!

Екеуіңе тілейміз шын бақытты,
Қарсы алыңдар қол ұстасып қарттықты.
Балаларың төбесіне көтеріп,
Сезініңдер таусылмайтын шаттықты!

Жәннатта да мәңгі бірге болыңдар,
Еш есепсіз, Фирдаустан орын ал!
Екі өмірде мұңсыз ғұмыр кешіріп,
Жақсы адам боп, адал жар боп қалыңдар!

Гүлмекен Қасенбай
23.11.2022